港人板私隱政策

最後更新 2026-10-08

港人板（包括港英板、港日板、港台板、港星板、港加板、港澳洲板，下稱「我哋」）係一個俾海外香港人用嘅分類留言板。留言板發帖同回覆唔使登記；分享食譜需要 Email 登入。部分分類需提供公開聯絡方法。呢份政策講解網站會處理咩資料。

1. 聯絡我哋

港人板由網站管理員營運。有任何私隱問題或者想刪除內容，請 email：info@hkerboard.com。

我哋唔會要求你提供真名、住址或者簽證資料，留言板毋須會員帳戶；「港人食譜」作者則需要用 Email 登入。部分分類需提供最少一個公開聯絡方法，可以選擇電話、WhatsApp、LINE 或電郵。

你發佈嘅內容：帖文標題、內容、價錢、地區、顯示名稱、回覆，同埋你自己寫喺帖入面嘅聯絡方法。呢啲會公開俾所有人睇到，請自己決定寫幾多。唔好寫住址、證件號碼或者其他人嘅資料。
食譜作者登入：Email 用嚟發送登入連結，同管理你發佈嘅食譜，唔會公開。作者名稱、食譜、相片同交流內容會公開。登入連結 15 分鐘內有效；登入狀態最長維持 30 日。你可以刪除食譜，或聯絡我哋刪除相關帳戶資料。
意見表格：意見內容、頁面位置及自願留下嘅電郵只供管理員處理同回覆，唔會公開，180 日後自動清除。
相片：「二手・放售」同「食譜・煮食」帖可以貼相。請唔好影到其他人嘅樣、車牌、地址或者電話。
防濫用記錄：網站會保留必要嘅使用記錄，用嚟防止洗版、濫用同騙案。一般保留 90 日；涉及騙案嘅記錄最長保留 12 個月。
改帖記錄：每次改帖或者刪帖之前，網站會保存一份當時嘅帖文內容，只有管理員睇到，用嚟處理騙案同舉報。保留 90 日（涉及騙案最長 12 個月）。

我哋唔會將資料用嚟賣廣告，亦唔會賣俾任何人。只會喺法律有效要求下（例如法院命令）先會提供我哋持有嘅記錄。

你可以用發帖時設定嘅改帖密碼自己改或者刪除帖文；回覆設咗刪除密碼都可以自己刪。唔記得密碼、或者想刪除其他人寫咗你資料嘅帖，請 email info@hkerboard.com，講明帖文編號。刪除咗嘅帖 30 日內會徹底清除。

我哋唔用廣告或者追蹤 cookies。網站會喺你部機（瀏覽器）記低你發過嘅帖同未發完嘅草稿，方便你搵返，呢啲資料唔會傳返俾我哋。網站可能會用運作必需嘅 cookies。

港人板只供 13 歲或以上人士使用。

如果政策有重大改動，我哋會喺「管理員公告」通知大家。